رەوەند مەلا مەحمود: جەژنی له‌دایكبوونی حه‌زره‌تی مه‌سیح بكه‌ین به‌ هه‌وێنی لێکنزیبوونەوەی لایەنەکان

ڕەوەند مەلا مەحمود لێپرسراوی مەڵبەندی دووی رێکخستنی کەرکوکی (ی.ن.ک)، بە بۆنەی لە دایك بوونی حەزرەتی عیسا مەسیح،  گەرمترین پیرۆزبایی ئاڕاستەی ھاونیشتمانییە مەسیحییەکانی کەرکوک و ھەرێم و عێراق و سەرانسەری جیهان دەكات و ھیواداریشه‌ ئەم جەژنە ببێتە مایەی خێر و ئاشتی و سەقامگیری بۆ ھەموولایەک.

ده‌شڵێت:"ئەم بۆنەیە بکەین بە ھەوێنی لێکنزیبوونەوەی لایەنە سەرکەوتوەکانی ھەڵبژاردنی ئەنجومەنی پارێزگای کەرکوک"

ده‌قی په‌یامه‌كه‌:

بە بۆنەی لە دایك بوونی حەزرەتی عیسا مەسیح، (سڵاوی خوای لێ بێت)، گەرمترین پیرۆزبایی ئاڕاستەی ھاونیشتمانییە مەسیحییەکانی کەرکوک و ھەرێم و عێراق و سەرانسەری جیهان دەكەم و ھیوادارم ئەم جەژنە ببێتە مایەی خێر و ئاشتی و سەقامگیری بۆ ھەموولایەک.

لەم بۆنەیەدا، سیاسەتی ئاشتیی و پێکەوە ژیانی نێوان سەرجەم پێکھاتەکانی کەرکوک، دووپاتدەکەینەوە، و دەخوازین ئەم بۆنەیە بکەین بە ھەوێنی لێکنزیبوونەوەی لایەنە سەرکەوتوەکانی ھەڵبژاردنی ئەنجومەنی پارێزگای کەرکوک، بەمەبەستی درووستکردنی ئیدارەیەکی خۆجێی ھەمەلایەن بۆ خزمەتکردن و گەیاندنی دەستی ئاوەدانی و دابینکردنی ژیانێکی شایستە بۆ کۆمەڵانی خەڵکی کەرکوک.

ڕەوەند مەلا مەحمود 
لێپرسراوی مەڵبەندی دووی رێکخستنی کەرکوکی (ی.ن.ک)