سوپای ئیسرائیل: شەوی رابردوو زیاتر لە 80 ئامانجمان لە تارانی پایتەخت پێکاوە

سوپای ئیسرائیل رایگەیاند، شەوی رابردوو زیاتر لە 80 ئامانجیان لە تارانی پایتەخت پێکاوە، لەنێویاندا بارەگای وەزارەتی بەرگری ئێران و دامەزراوە ئەتۆمییەکان و چەند ئامانجێکی دیکە، کە ئەرشیفی ئەتۆمیی ئێرانی تێدا حەشاردرابوو، ئەوەش لەکاتێکدایە هێرش و ئاڵۆزییەکانى نێوانیان لە رۆژی سێیەمدا توندتر بووەتەوە و هێرشەکان لە هەردوولاوە بەردەوامن.
ئێفی دێفرین، وتەبێژی سوپای ئیسرائیل لە کۆنفڕانسێکی رۆژنامەوانیدا رایگەیاند، هێرشەکان دامەزراوەکانی پەرەپێدانی چەکی ئەتۆمی و کۆگاکانی سوتەمەنیان لە ئێران بەئامانج گرتووە.
راشیگەیاند، فڕۆکە جەنگییەکانیان چەندین ئامانجی حوسییەکانیان لە یەمەن بۆردوومانکردووە.
وتیشى، شەڕەکە لە سەرجەم بەرەکانە و لە غەززەش بەردەوامە و ئامانجەکانیان لە غەززە نەگۆڕە، ئەویش لەناوبردنی حەماس و گەڕانەوەی بارمتەکانە.
وتەبێژی سەربازی ئیسرائیل جەختی لەوەشکردەوە، لە کارکردن دژى هەر لایەنێک بەردەوام دەبن کە هەڕەشە لە دەوڵەتی ئیسرائیل بکات.