عیراق دەیەوێت بە رێكارى یاسایی و ئەمنی هاوڵاتیانى خۆى لە کەمپی هۆل وەربگرێتەوە

حکومەتى عیراق زۆربەی ڕێکارە ئەمنیی و کۆمەڵایەتییەکانی بۆ گەڕاندنەوەی خێزانە عیراقییەکان لە کەمپی هۆل تەواوکردووە.
سەبارەت بەم پرسە فازل ئەبو رغیف شارەزای ئەمنی رایگەیاند: هەموو ئەو کەسانەی کە مەترسی ئەمنی و تایفەگەرییان لەسەر نییە، ڕێگەیان پێدەدرێت لەکەمپی هۆلەوە بگەڕێنەوە ناوچەکانی خۆیان، هاوکات ئەو کەسانەشی تێوەگلاون لە کردەوەی تیرۆریستی ڕەوانەی دەسەڵاتی دادوەری دەکرێن.
باسیلەوەشکرد: ئەو خێزان و کەسانەی ئەو دوو مەرجە بۆ گەڕانەوەیان نایانگرێتەوە، لە کەمپی جەدعە لە پارێزگای نەینەوا یان لە کەمپەکانی دیکەدا نیشتەجێ دەکرێن تاوەکو دۆسیەکانیان یەکلادەکرێتەوە.
ئاماژەى بەوەشکرد: عیراق تەنیا هاووڵاتیانی خۆی دەگەڕێنێتەوە و بەرپرسیارێتی هیچ کەس و خێزانێکی بیانی هەڵناگرێت، پرۆسەی گەڕانەوەى خێزانە عیراقییەکانى کەمپی هۆلیش بەهاوکاری نەتەوە یەکگرتووەکان بەڕێوەدەچێت.
هەر سەبارەت بە کەمپی هۆل, روانگەی سوریی بۆ مافەکانی مرۆڤ لەڕاگەیەندراوێكدا بڵاویكردەوە: گەڕاندنەوەی خێزان و كەسوكاری ئەندامانی داعش لەسەر داوای عیراق بووە.
دەشڵێت: دوای تەواوكردنی رێكارە یاسایی و ئەمنییەكان چوارشەممەى ڕابردوو (161) خێزانی عیراقی كە لە (607) كەس پێكهاتون كەمپی هۆلیان بەجێهێشتوە و گەڕێنراونەتەوە بۆ وڵاتەكەی خۆیان.
پێشتریش حكومەتی عیراقی رایگەیاندبوو، دوای گەڕاندنەوەی خێزان و كەسوكاری ئەندامانی رێكخراوی داعش لە كەمپەكان نیشتەجێیان دەكەن و خولی راهێنانیان بۆ دەكەنەوە بۆ ئەوەی دەستبەرداری ئەو بیرە توندڕەوییە ببن و پاشان تێكەڵ بە كۆمەڵگە دەكرێنەوە.
کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراوەتەوەو بەپێی زانیارییەكانیش (80%)ـی دانیشتوانی كەمپەكە لە ژن و منداڵ پێكدێن، کە 18 هەزاریان عیراقین، حکومەتى عیراقیش جەخت لە گەڕانەوەی هەموویان دەکاتەوە.