دژە تیرۆر: هێرش کرایە سەر سێ کێڵگەی نەوتی لە زاخۆ و دهۆک

دژە تیرۆری هەولێر رایدەگەیێنێت، سەرلەبەیانیی ئەمڕۆ بە درۆنی بۆمبڕێژکراو هێرشکرایە سەر سێ کێڵگەی نەوتی لە سنووری زاخۆ و دهۆک.

دژە تیرۆری هەولێر ئەمڕۆ چوارشەممە، 16-7-2025 لە راگەیێندراوێکدا دەڵێت، "بەگوێرەی زانیارییەکانی دژە تیرۆری هەولێر، بەیانیی ئەمڕۆ چوارشەممە لە کاتژمێرەکانی 6:00 و 6:15، لە رێگەی دوو درۆنی بۆمبڕێژکراوەوە هێرش کرایە سەر کێڵگەی نەوتیی DNO لە پێشخابوور لە ئیدارەی سەربەخۆی زاخۆ".
هەروەها دەشڵێت، "لە کاتژمێر 7:00 لە رێگەی درۆنێکی بۆمبڕێژکراوەوە هێرش کرایە سەر کێڵگەی نەوتیی DNO لە تاوکێ لە سنووری ئیدارەی سەربەخۆی زاخۆ".
بەپێی زانیارییەکانی دژە تیرۆر، "جگە لە زیانی مادیی کە بەر کێڵگەکان کەوتوون، هێرشەکان زیانی گیانییان نەبووە".
دژە تیرۆر ئاماژەی بەوەش کردووە، "لە کاتژمێر 7:14، لە رێگەی درۆنێکی بۆمبڕێژکراوەوە هێرش کرایە سەر کێڵگەی نەوتی هەنت ئۆیلی ئەمریکی لە باعەدرێ لە قەزای شێخانی سەر بە پارێزگای دهۆک، خۆشبەختانە هیچ زیانێکی گیانی و مادیی لێ نەکەوتەوە".