پەرلەمانی عیراق بۆ تاوتوێی شەڕی ئیسرائیل و ئێران کۆدەبێتەوە

ئەمڕۆ، پەرلەمانی عیراق بۆ تاوتوێی شەڕی ئیسرائیل و ئێران و کاریگەریی لەسەر وڵاتەکە کۆدەبێتەوە. 

فەرمانگەی میدیای ئەنجومەنی نوێنەرانی عێراق بڵاوی كردەوە: ئەمڕۆ سێشەممە، سەعات یەکی دوانیوەڕۆ كۆبونەوەی نائاسایی ئەنجومەنی نوێنەرانی عێراق بەڕێوە دەچێت.

بەپێی ئەو كارنامەیەی بڵاوكراوەتەوە، كۆبونەوەكە یەك بڕگە دەبێت، ئەویش تاوتوێكردنی هێرشی ئیسرائیلە بۆ سەر ئێران و بەزاندنی سەروەریی عێراقە لەلایەن ئیسرائیل بۆ هێرشكردنەسەر ئێران.

ئەوە لەكاتێكدایە، ململانێی سەربازیی نێوان ئیسرائیل و ئێران پێی نایە رۆژی پێنجەم و هێرش و بۆردومانەكانی هەردولا بۆ سەر یەكتری چڕتربونەتەوە و مەترسی فراوانبونیشی لێدەكرێت.

حکومەتی عێراق، ئیسرائیلی تۆمەتبار کردووە بە بەکارهێنانی ئاسمانی وڵاتەکەی بۆ هێرشەکردنە سەر ئێران و لە ئەنجوومەنی ئاسایشی نێودەوڵەتیی سکاڵای دژی ئەو وڵاتە تۆمار کردووە.

بەهۆی ئەوەی عێراق سیستمی بەرگریی ئاسمانیی پێشکەوتووی نییە، ئاسمانی وڵاتەکە بووەتە گۆڕەپانێک بۆ تێپەڕبوونی مووشەک و فڕۆکەی هەردوو لایەنی شەڕکەری ئیسرائیل و ئێران.