پزیشکیان: دەستبەرداری وزەی ئەتۆم نابین

سەرۆککۆماری ئێران بەکارهێنانی وزەی ئەتۆم بە ''مافی رەوا''ـی وڵاتەکەی دەزانێت و دەڵێت، بۆ بەدیهێنانی ئەم مافە، پێداگرین و ترسمان لە هیچ هێزێک نییە.
 ئەمڕۆ بە ئامادەبوونی مەسعود پزیشکیان، سەرۆککۆماری ئێران لە پەرلەمانی وڵاتەکە، متمانەدان بە عەلی مەدەنیزادە، وەکو وەزیری ئابووری و دارایی خرایە دەنگدانەوە.
مەسعود پزیشکیان لە دەستپێکی دانیشتنەکەدا وتارێکی سەبارەت بە بەردەوامبوون لەسەر پیتاندنی یۆرانیۆم پێشکەشکرد و رایگەیاند: ئێمە مافی ئەوەمان هەیە لە وزەی ئەتۆم و توێژینەوە زانستییەکان سوود وەربگرین، بۆیە هیچ کەسێک بۆی نییە ئەم مافە لە ئێمە وەربگرێتەوە.
سەرۆککۆماری ئێران جەختی لەوە کردەوە، ئێمە بۆ بەدیهێنانی ئەم مافە، پێداگرین و لە هیچ هێزێک لە پێناو بەکارهێنانی وزەی ئەتۆم ترسمان نییە.
هەر لەو وتارەدا مەسعود پزیشکیان رەخنەی لە سیاسەتی نێودەوڵەتیی واشنتن گرت و وتی: ئەمریکا خەریکی زۆردارییە و پێچەوانەی یاسا نێودەوڵەتییەکانە، رێگە دەدات ئیسرائیل دەستدرێژی و هێرش بکاتە سەر وڵاتەکەمان.