عیماد ئەحمەد: راگەیاندنی یه‌كێتی دەبێت راستگۆیانە پەیامەکانی بگەیەنێت

عیماد ئەحمەد لە یادی یۆبیلی زێڕینی 50 ساڵەی یەکێتی سوپاس و پێزانین ئاڕاستەی راگەیاندنکارانی یەکێتی دەکات و تەئکید دەکاتەوە میدیایی یەکێتی پابەند بە پرەنسیپەکانی راگەیاندن و پاراستنی بەها کۆمەڵایەتییەکان، دووپاتیشی دەکاتەوە:" پەیامەکانمان ئاڕاستەدەکەین و هەمیشە راستگۆیانە لەگەڵ خەڵک و گەیاندنی خواستەکانیان دەبین" .

عیماد ئەحمەد لێپرسراوی مەکتەبی راگەیاندن و هۆشیاری لەگەڵ ئەنجوومەنی بۆردی راگەیاندن و کەناڵەکانی راگەیاندنی یەکێتیی کۆبووەوە .

لە سەرەتای کۆبوونەوەکەدا، لەتیف نێروەیی لێپرسراوی بۆردی راگەیاند راپۆرتێکی زارەکی لەبارەی چالاکییەکانی راگەیاندن و یادی یۆبیلی زێڕین خستەڕوو و سوپاسی ئاڕاستەی هەڤاڵانی یەکێتیی کرد و راگەیاند بەرپرسیارانەو پیشیانە و یەکێتیانە ئەرکەکانیان راپەڕاندن و دووپاتی لە سەرخستنی هەنگاوەکانی خۆڕێکخستنەوەو پێداچوونەوە بە پەیامی میدیایی کردەوە.

پاشان، عیماد ئەحمەد لە کۆبوونەوەکەدا وێڕای دەربڕینی سوپاس و پێزانین بۆ سەرجەم رۆژنامەنووسان و میدیاکارانی یەکێتی لە کەناڵ و ئۆرگان و شوێنە جیاکان کە لە ئەرکدان و لەگەڵمان نین و بە قەڵەم و بیرو هزریان خزمەتی کوردستانەکەمان و یەکێتی دەکەن، رایگەیاند:"ئەوەی راگەیاندنی یەکێتی لە میدیاکان دیکە جیادەکاتەوە هەست کردنمانە بە بەرپرسیارێتی و هەرگیز نەبووینەو نابینە بەشێک لە تێکدانی سەقامگیری سیاسی و کۆمەڵایەتی"، بۆئەوەش جەختی لە پابەندبوون بە بڕیارەکانی سەرۆک و سەرکردایەتی یەکێتی کردەوە  و  وتی:" یەکێتی هەمیشە بەشێکە لە چارەسەر نەک کێشە، بۆیە راگەیاندنەکەشمان دەبێت بەهەمان رۆحیەتەوە کاربکات و راستگۆیانە پەیامەکانی بگەیەنێت".

بۆ ئەم هەلومەرجەی ئێستای کوردستان و عیراق و ناوچەکەش، لێپرسراوی مەکتەب ئەرک و سیاسەتی کارکردنی میدیایی بۆ ئەم قۆناغە روونکردەوە.