عیراق لە رووی زۆری فەرمانبەرەوە دووەمینی وڵاتانی عەرەبییە

رۆژنامەیەکی عەرەبی ئاشکرای دەکات لە نێو وڵاتانی عەرەبیدا، عێراق و میسر زۆرترین فەرمانبەری کەرتی گشتییان هەیە.
رۆژنامەی دەستوور بڵاویکردووەتەوە، بەیاننامە ڕەسمییەکانی عێراق و میسر ئاشکرایانکردووە، عێراق و میسر لەڕیزبەندی یەکەمی وڵاتە عەرەبییەکاندان بە دامەزراندنی فەرمانبەران لە کەرتی گشتیدا.
بەگوێرەی ئامارەکان، میسر لە ریزبەندی یەکەمدایە و پێنج ملیۆن و 600 هەزار فەرمانبەری هەیە و بەدوای ئەودا عێراق دێت کە پێنج ملیۆن فەرمانبەری کەرتی گشتی هەیە.
ئەوە لە کاتێکدا سعودیە سێ ملیۆن و 166 هەزار، جەزائیر ملیۆنێک و 100 هەزار، ئوردن 568 هەزار، کوەیت 473 هەزار فەرمانبەری کەرتی گشتییان هەیە.
رۆژنامەکە نوسیوویەتی یەکێک لە کێشە و ئاڵنگارییەکانی بەردەم حکومەتە عەرەبییەکان ئیدارەدانی کەرتی گشتییە ئەوە لە کاتێکدا ژمارەیەکی زۆر لە فەرمانبەرانی وڵاتانی عەرەبی ئەرکی خۆیان جێبەجێ ناکەن.