په‌رله‌مانی كوردستان: لە دادگا نێودەوڵەتییەكاندا بەرپرسیارانی كۆمەڵكوژیی ئێزدییەكان دادگایی بكرێن

لە ساڵیادی كۆمەڵكوژیی ئێزدییەكاندا سەرۆكایەتیی پەرلەمانی كوردستان پەیامێكی بڵاوكردەوە و رایگەیاند، پێویستە حكومەتی عیراق بە ئەركی ئەخلاقی خۆی هەڵبستێت و ڕێگە بە ڕێكخراوە نێودەوڵەتییەكان و تیمی تایبەتیی نەتەوە یەكگرتووەكان بۆ لیكۆڵینەوە لە تاوانەكانی داعش بدات كە ئەو تاوانكارییە دۆكیۆمینت بكات و لە دادگا نێودەوڵەتییەكاندا بەرپرسیارانی ئەو تاوانكارییە دادگایی بكرێن.
دەقی پەیامەكە:

3ی ئابی 2014، ڕۆژێكی كارەساتبار و خەمناكە لە مێژووی خەڵكی كوردستان، لەو  ڕۆژەدا تیرۆریستانی داعش بە بەرچاوی هەموو جیهان هێرشێكی دڕندانەیان كردە سەر قەزای شنگال و كچ و ژنانی كوردانی ئێزدییان بە بارمتە برد و پیاو و گەنجەكانیشیان زیندەبەچاڵ كرد.

لە كاتێكدا یادی ئەو ڕۆژە ڕەشە دەكەینەوە، پێویستە سوپاسی خۆڕاگری و گیانفیدایی پێشمەرگە قارەمانەكانی كوردستان و هاوكاریی وڵاتانی دۆست بكەین كە ڕێگەیان نەدا  تاریكپەرستانی داعش پێشڕەویی زیاتر بكەن و بێنە ناو قووڵایی خاكی كوردستان و سەرجەم پێكهاتەكانی كوردستان و ناوچەكەشیان لە چەپۆكی ڕەشی تیرۆریستان پاراست و ئەفسانەی داعشیان تێكشكاند.

پەرلەمانی كوردستان لە دانیشتنی ژمارە (3)ی نائاسایی خۆیدا لە ڕێكەوتی 3-8-2019، ڕۆژی 3ی ئابی 2014ی وەك ڕۆژی كۆمەڵكوژیی ئێزدییەكان دیاریكرد، بۆئەوەی لەڕووی یاساییەوە زەمینەسازی بكرێت بۆ قەرەبووكردنەوەی خەڵكی شنگال و قوربانییەكانی ئەو تاوانكارییە دڕندانەیە، داواش لە حكوومەتی عیراق دەكەین كە بە ئەركی یاسایی و ئەخلاقیی خۆی هەڵبستیت و ڕێگە بە ڕێكخراوە نێودەوڵەتییەكان و تیمی تایبەتیی نەتەوە یەكگرتووەكان بۆ لیكۆڵینەوە لە تاوانەكانی داعش (UNITAD) بدات كە ئەو تاوانكارییە دۆكیۆمینت بكات و لە دادگا نێودەوڵەتییەكاندا بەرپرسیارانی ئەو تاوانكارییە دادگایی بكرێن و قەرەبووی قوربانییان بكرێتەوە و سەرجەم ئەو تاوانكارییانەی لە دژی خەڵكی كوردستان ئەنجام دراون بە جینۆساید بناسێنن.

لە كۆتاییدا سەری ڕێز و نەوازش بۆ شەهیدانی شنگال و قوربانییانی جینۆسایدی شنگال دادەنەوێنین، داواكارین پەلە بكرێت لە گەڕان بە دوای بێسەروشوێنان و دیاریكردنی چارەنووسی نادیاران و گەڕاندنەوەی دانیشتووانی شنگال بۆ زێدی بابوباپیرانی خۆیان.