گەشتەکانی فڕۆکەخانەی نێودەوڵەتیی سلێمانی و هەولێر راگیران

بەهۆی هێرشەکانی ئیسرائیل بۆ سەر ئێران هاوشێوەی فڕۆکەخانەکانی دیکەی عێراق گەشتە ئاسمانییەکان لە فڕۆکەخانەی نێودەوڵەتیی هەولێر و سلێمانی راگیران.
بەگوێرەی زانیارییەکان سەرجەم گەشتە ئاسمانییەکان لە فڕۆکەخانەی نێودەوڵەتیی هەولێر راگیراون، هیچ وادەیەکیش بۆ دەستپێکردنەوەی رانەگەیەندراوە.
هەر بەگوێرەی زانیارییەکان، لە ئێستادا گەشتیارێکی زۆر لە فڕۆکەخانەکەدان و قەرەباڵغی زۆر دروستبووە و لە چاوەڕوانی دەستپێکردنەوەی گەشتەکاندان.
هاوکات، گەشتە ئاسمانییەکان لە فڕۆکەخانەی نێودەوڵەتیی سلێمانیش راگیران، بەشێوەیەک بەپێی خشتەی گەشتەکانی فڕۆکەخانەی نێودەوڵەتیی سلێمانی، لە بەرەبەیانی ئەمڕۆوە سێ گەشتی رۆیشتن لە فڕۆکەخانەکە هەڵوەشاونەتەوە و گەشتێکیش کە بڕیاربوو نیوەڕۆی ئەمڕۆ ئەنجامبدرێت دواخراوە.
هەر بەپێی خشتەکە، لە بەرەبەیانی ئەمڕۆوە سێ گەشتی هاتوو کە دووانیان بڕیاربوو لە تارانەوە بێت و یەکێکیشیان لە بەغدادەوە، هەڵوەشاونەتەوە.