عیراق توانای عەمبارکردنی بڕی ٥ ملیۆن و ٤٠٠ هەزار تۆن گەنمی هەیە

وەزارەتی بازرگانی عێراق رایگەیاند، پرۆسەی بە بازاڕکردنی گەنمی جوتیاران بەردەوامە و تاوەکو ئێستا سێ ملیۆن و 400 هەزار تۆن گەنم لە جوتیاران وەرگیراوە.
حەیدەر گەرعاوی، بەڕێوەبەری گشتیی کۆمپانیای بازرگانی دانەوێڵە، رایگەیاند، پێشبینی دەکەن بەرهەمی گەنمی ئەمساڵ بگاتە پێنج ملیۆن تۆن و تاوەکو ئێستاش سێ ملیۆن و 400 هەزار تۆن بە بازاڕکراوە.
وتیشی، لە پارێزگاکانی ناوەڕاست و باشووری عێراق، لە بەغدا تاوەکو بەسرە، پرۆسەی دروێنه و بازاڕکردن لە رۆژی هەینییەوە تاوەکو نۆی حوزەیران کۆتایی دێت، جگە لە چەند شوێنێک کە ماوەی رۆژێک بۆ دوو رۆژیان بۆ درێژدەکرێتەوە بە گوێرەی ئەو بارهەڵگرانەی نۆرەیانگرتووە و هێشتا گەنمەکەیان بەتاڵ نەکردووە.
بەڕێوەبەری گشتیی کۆمپانیای بازرگانی دانەوێڵە وتیشی، لە ئێستادا بەبازاڕکردن لە پارێزگاکانی بەغداد، ئەنبار، سەڵاحەدین، دیالە، کەرکوک و نەینەوا بەردەوامە، لە هەر سێ پارێزگاکەی هەرێمی کوردستانیش هەولێر و سلێمانی و دهۆک، لە 10ـی حوزەیران دەست بە بازاڕکردن دەکرێت.
ئاماژەی بۆ ئەوەشکرد، کۆی گشتیی بەرهەمی گەنمی عەمبارکراو بۆ ئەمساڵ دەگاتە نزیکەی پێنج ملیۆن و 400 هەزار تۆن، بەمەش عێراق دەگاتە ئاستی خۆبژێوی.
ئاشکراشیکرد، پارێزگای واست زۆرترین بەرهەمی گەنمی تیادا بەرهەمهێنراوە بە بڕی 543 هەزار تۆن.