دەزگای ئاسایشی هەرێم باندێکی هەڵخەڵەتاندن دەستگیرده‌كات

بەڕێوەبەرایەتی لێکۆڵینەوەی دەزگای ئاسایشی هەرێم بەهەماهەنگی بەڕێوەبەرایەتی ئاسایشی پارێزگای سلێمانی، باندێکی هەڵخەڵەتاندنیان دەستگیرکرد کە خەڵکیان فریوداوە بەفرۆشتنی گورچیلە.

 لە راگەیەندراوێکدا، بەڕێوەبەرایەتی لێکۆڵینەوەی دەزگای ئاسایشی هەرێم ئاشکرای کرد:" لەسەر سکاڵای هاوڵاتیان و بەبڕیاری دادوەری لێکۆڵینەوەی ئاسایش، بەڕێوەبەرایەتی لێکۆڵینەوەی دەزگای ئاسایشی هەرێم، بەدواداچوونی ووردی ئەنجامدا، لەڕۆژانی 7و8ی 5ی 2025 توانرا لەشاری سلێمانی باندێکی( 4 )کەسی دەستگیربکەن".

راشیگەیاندووە، تۆمەتباران : "بڕی 32ملیۆن دیناریان لە پێنج خێزان وەرگرتووە و فریویان داون بەوەی گورچیلە لەبەرامبەر بڕێک پارەدا دەفرۆشن".

لە کۆتایشدا، بەڕێوەبەرایەتی لێکۆڵینەوەی دەزگای ئاسایشی هەرێم رایگەیاندووە:" لەئێستادا تۆمەتباران بەماددەی ( 456 ) ڕاگیراون و لێکۆڵینەوە لەدۆسیەکانیان بەردەوامە".