لیڤەرپول تەنها پرێمەرلیگى نەبردەوە مێژووەکەشى داگیرکرد !

لیڤەرپول تەنها پرێمەرلیگى نەبردەوە مێژووەکەشى داگیرکرد !
ئاکۆ بیبانى

یانەى لیڤەرپولى ئینگلیزى تەنها نازناوى خولى یانەکانى ئینگلتەراى نەبردەوە بەڵکو هێدى هێدى دەیەوێت بەشێکى گەورەى مێژووى پرێمەرلیگ بەناوى خۆیەوە بکات ، تاکو دوێنێ شەیتانە سوورەکان گەورەو سەردارى خولى ئینگلیزى بوون و زۆترین نازناوى خولەکەیان لەگەنجینەیی یانەکە جێگیرکردبوو ، شەوى رابردوو رێدز بوونە پاڵەوانى خولى نایابی ئینگلتەرا و بۆجارى 20 هەمین لە مێژوودا جامەکەیان بەرزکردەوە ، کە ئەمەش یەکسانکردنەوەى ژمارە پێوانەییەکەى ئەهریمەنە سوورەکان بوو کە 20 جار نازناوى پرێمەرلیگیان بەدەستهێنابوو .
لیڤەرپوول 234 رۆژە لە ریزبەندى یەکەمى خولى نایابی ئینگلیزیە ، ئارنى سلۆت لەسەرەتاى وەرزەوە چاوەڕوانی ئەوەى لێ نەدەکرا بەوشێوەیە لەگەڵ پێکهاتەکەى خۆى بگونجێنێنێت بەڵام لەوە خێراتر کارەکانى ئەنجامدا کە ئیدارەى یانەکە متمانەیان پێ بوو ، لە 10 یارى سەرەتاى خولەکە ( 8) بردنەوەى دەستەبەرکردو لە (1) یاریشدا یەکسانبوو، لە تەنها یارییەکەیشدا تامى شکستى کرد ، کە ئەمەش باشترین دەستپێکى راهێنەربووە لەمێژووى لیڤەرپول .
هێڵى هێرشبەرى یانە سوورپۆشەکە زۆر ترسناک بوو تاکو ئێستا 80 گۆڵیان لەسەرجەم یانەکان تۆمارکردوە ، ( 591) لێدانیان ئاراستەى خانەى گۆڵى تیپەکانى دژ کردوە کە ئەمەش هیچ یانەیەکى دیکەى پرێمەرلیگ پێى نەکراوە .
75% گۆڵەکانى یانەى لیڤەرپول چاوەڕوانکراوبوونە ، (438 ) لێدانى لە ناوچەى بۆکسەوە ئاراستەى خانەى گۆڵکردوە کە (72) لێدانى زیاترە لەسەرجەم یانەکانى دیکە .
بەراورد بە وەرزی ڕابردوو ڕێژەی لێدانەکانى لیڤەرپوول لە(  20.8)  لێدان لە هەر یارییەکدا بۆ(  17.4)  لێدان دابەزیوە، بەڵام ڕێژەی لێدانەکان لە ناوچەی سزا لە 65.9% بۆ 74.1% زیادیکردووە، ئەمەش ئاماژەیە بۆ باشتربوونی کوالیتی هەلەکان.
تیپەکە لە 34 یاریدا 32 گۆڵی لێکراوە ، کەئەمەش دووەم باشترین بەرگرییە لەدوای ئارسناڵەوە کە 29 گۆڵی لەسەر تۆمارکراوە .
لیڤەرپوول(14) گۆڵی لە هێرشی پێچەوانەی خێرا تۆمارکردوە، ئەمەش بەرزترین ژمارەیە کە هیچ تیپێک تۆماری نەکردوە ، هەروەها 10 گۆڵیان لە فشارە بەرزەکانەوە تۆمارکردووە.
لیڤەرپوول لە هاویندا هیچ گرێبەستێکی گەورەی نەکرد، جگە لە فێدریکۆ کیێزا کە بە درێژایی وەرز تەنها 33 دەقیقە لە خولەکەدا یاریی کردوە.