یەکێتی و پارتی لەسەر ئاستی باڵا پرسی پێکهێنانی کابینەی نوێی حکومەت تاوتوێ دەکەن

ئەمڕۆ لە دووکان سەرۆک بافڵ جەلال تاڵەبانی و مەسرور بارزانی جێگری سەرۆکی پارتی کۆدەبنەوە، گفتوگۆ لەسەر پێکهێنانی کابینەی نوێی حکومەت و بەتایبەت دابەشکردن پۆستەکان دەکەن.
پێشتر سەعدی ئەحمەد پیرە وتەبێژی (ی.ن.ک) بە سایتى ڕەسمى یەکێتى راگەیاندبوو: بەسەرۆکایەتی بافڵ جەلال تاڵەبانی و مەسرور بارزانی  لە ئاستی باڵا (ی.ن.ک) و پارتی دیموکراتى کوردستان لە هاوینەهەواری دوکان کۆدەبنەوە.
هەرلەبارەی کۆبونەوەی لوتکەی ئەمڕۆوە وتەبێژی یەکێتی رایگەیاندووە، لە کۆبونەوەکەدا پرسی پێکهێنانی کابینەی نوێی حکومەت تاوتوێ دەکرێت و چاوەڕوان دەکرێت زۆر لایەنی گرنگی پەیوەست بە پێکهێنانی کابینەی دەیەم یەکلابکرێتەوە.
مانگی تشرینی یەکەمی پار، هەڵبژاردنی پەرلەمانی کوردستان بەڕێوەچوو، لەوکاتەوە وەفدی دانووستانکاری یەکێتی و پارتی چەند کۆبوونەوەیەکیان کردووە و لەسەر شێوازی حکومڕانی رێککەوتوون، ئەوەی ماوەتەوە تەنیا رێککەوتنە لەسەر دابەشکردنی پۆستەکان، بڕیارە ئەمڕۆ ئەوەش تاوتوێ بکرێت.